صعبة شوي اذا ما كنت شامي‎

**رمش العين** · 19-01-2010

اذا ما كنت شامي ( عن حأ وحأيئ ) لا تحاول تأرئ

أول ما جهجه الضو ، إجا يوسف ليشطف البيت، منشان البأ ، سكّر باب الصئاء، شلح الشحاطة مشان ما يجئجئ، و جرجر الكراسي و شئف الزريعة ، و تكتك شلون بدو يشطف، بحبش شوي، دندل البربيش و شغل المي من الجب، سخنا عالنار لبقبقت و بربقت، و كتا بالحوش الجواني بالطاسة لانو ما عندن سطل أو أسطل و صهريج و خرطوم،

و دعك الارض منيح من الزفر لإنو دبئة ، فك الكمر ليترحرح و شلح الشلحة ، مشان ما تتشحور،

و شلفا وراه، و فشخ فوق المي ، و دأر شوي ، و بعدين نط بجعزة ، آم تفشكل بكومة دف ، وانطبش جواتا،

طبشة آتولية ، و انجرحت إيدو واوا حشّك ولبك، و صرّخ وجعّر آخ يا يامو ، يا يابي ، وإجيت إمو

وبإيدا الطواية و الشمشاية و قالتلو يييي عليك ، ليش عم تحركش و تنكّش ، متل البوبو ، كنت امسيك الدرابزين، شو معمصة عيونك و مفشفش ، ائعود عالبرطوشة ، و تلقح عالزيق ، و حاج تطرطق و تفرتّك ،

وآمت دحتّه دحة ، و جابتلو شئفة شرطوطة و ربطتلوا ياها ، بعد ما غسلتا بالمي وعصرتا ، و طرطشت تنورتا، و آلتلو أوم تكرفت وللي على آمتك شو نعيان ، ناتع هالطول علفاضي ، أوم من وشّي ، هزيتللي بدني , تضرب بهالآمة ، وما شطفت البيت ، ولا راح البأ ، ،،

((((( يتحورئو على الرسالة شو مبندء ومسرسئ سرسئة !!!!

**@المشتاق@** · 19-01-2010

ههههههههههههههههههههههههه ههههههه هي هي كل القصة
فكرت في شي في الاخر
وضليت ساعة اقرأ لفهمتها هههههههههههه

**خالدبرمو** · 20-01-2010

ان اللهجات مثل الوجوه متباينه مختلفه
واللهجه التي نفهمها هي التي نحبها
لكن هناك لهجات لو لم تفهمها تحبها مثل اللهجه الشاميه
والكلام الشامي
والوجه الشامي
والياسمين الشامي
وشكرا يا نظر عيني ع الفكره شو حلوه

**مارجريت** · 22-01-2010

ههههههههههههههههههههههه والله ساعه لفهمت شو كاتبه ..يسلموو

**ammarroo** · 22-01-2010

انو مو تاركين كلمة شامية شاغورية اصلية إلا وكاتبينا هههههههه
يسلمووووووو اخت رمش العين عنجد حلوة وبدها ناسها ليقرأوها

**قمرالزمان$** · 24-01-2010

هههههههههههههههههه
أنا دغري عرفت أقرأهن بس في كلمات ما فهمت شو معناتا

حلو الحكي الشامي وخاصة الشاغوري مو

*********************************
قمـــــwith my greetsــر الزمان

**عاشقة قاسيون** · 24-01-2010

وك يسعد الله الشام
واهل الشام
والحكي الشامي
واللهجة الشامية
وكل شي بالشام
دخيل الله اذ في احلى من بلدنا الغالي الشام عوجه الكرة الارضية
مشكوررررر رمش العين عل الموضوع بالنسبة الي فهمتن كلن
يعطيك الف عافية

**vampire** · 25-01-2010

مشكورة و كتير حلوة...و الاحلى لما بتفوتي عالشاغور و بتشوفي الفيلم صوت و صورة....نهفة...كل واحد بيوقف على شواربو نسر...

يا ريت لو تنزليلنا موضوع عن الجأجأة الحلبية...و عبّستنى جديدك خيت...

مشكورة مرة تانية..
تقبلي مروري...