طريقة عمل مربى الحليب dulse de leche

[خالد النفوري]

مرحبا جميع وكل عام وأنتم بخير
هذه عيارات وطريقة صنع الدولسي دي ليتشي من الشيف أم خالد (والدتي)
وصلتني بالأيميل لأنني طلبتها منها لأشارك في مطبخكم
مربى الحليب ( أرجنتيني المصدر)
العيارات:
أ-3 كغ حليب
ب- 700 غ سكر أو3أوقية ونصف
ت- باكيت فانيلا
ث-نصف ملعقة شاي كربونا
طريقة الصنع: يغلى الحليب ثم يضاف السكر ثم يضاف الفانيلا مقدار ملعقتين كبيرتين ثم الكربونا
يغلى على نارمتوسطة مع التحريك بملعقة خشبية بين الحين والأخر واذا في عندك دحاحل حطي 3 او4 بترتاحي من التحريك ( الدحاحل هي الكرات الزجاجية الصغيرة التي يلعب بها الأطفال )
يستغرق الغلي اكثر من ساعة ونصف وما فوق حسب الحليب واذا كان دسم بدو شوية ماء
نضع قليل منه في صحن حتى يبرد اذا سال الممروت يحتاج الى زيادة غلي حتى يصبح بسماكة العسل تقريبا
وهناك طريقة للحصول على نفس الطعم تقريباً: ضعي في طنجرة الضغط المملوءة بالماء علب الحليب المحلى نستلة واضغطيها جيداً وضعيها على النار بحيث تصفر الصفارة لمدة 45 دقيقة فتكون مربى حليب مقلد (هذا للعزابية )
مع تمنياتنا بدولسي دي ليتشي ناجح باذن الله تعالى
وادعوا لأمي ( وألف صحة )

[GHiath Bakro]

ممممممم شكرا لك اخي الكريم سقا الله تلك الايام كنت اذهب خصياصا الى معمل لميس الذي كان متواجد في ديرعطية لااحصل على مربى الحليب سقا الله تلك الايام

[●•°BaSmA°•●]

بارك الله بك وبوالدتك الله يطول بعمرها ويخليها
نفس طريقة والدتي الغالية لكن بتستبدل نكهة الفانيلا بعودين قرفة
والطعمة فعلا رهيبة وطيبة
شكرا لك وكل عام وأنت بخير .

[baby3]

شكرا خوليو و الله ايطول بعمر التيا ام خالد
يا جماعة مربى الحليب كتير طيب جربوه و ما راح تتندموا

[§Nosa§]

شكراً لك ...والله يخليلك الوالدة يارب..

[دموع الورد]

ماشاء الله شي ظريف والله لكن شلون طريقة الاخ جوليو تبع طنجرة الضغط ما فهمتها شلون نحط العلبة من دون فتحها جوات الطنجرة اشرحولي ياها اذا بتريدوا يلي عندو فكرة
واول مرة بسمع انو في مربى للحليب

[خالد النفوري]

نعم أختي ضعيها وهي مختومة
وصحة على قلبك

[●•°BaSmA°•●]

كان الصيام مأثر علي ورجعت استفسر عن المربى
أول شي أخي خوليو مربى الحليب ما بينعمل إلا بحليب كامل الدسم وهون ما بنعمله لأنو الحليب كلو خفيف حتى لو مكتوب عليه كامل الدسم
اتأكدلنا من هالمعلومة لأنو إضافة الماء أول مرة بسمع فيها
صحي بيطلع دسم كتير بس بيطلع غير شكل متلو متل المهلبية والرز بحليب
طيبين بحليب الجاهز لكن لما بكون الحليب طازج بتبقى النكهة أطيب وأدسم

تاني استفسار
عن طبخ حليب النسلة بطنجرة الضغط
طيب طالما هو نسلة ليش لتطبخو مرة تانية ؟
وسؤال ؟شو لون مربى الحليب المطبوخ بطنجرة البخار ؟
لأنو بعرف اللي بدو يعمل توفي من حليب النسلة بيطبخو بنفس الطريقة او بطنجرة عادية وبتاخد وقت من ساعتين لـ3 ساعات .

معليش كترت أسئلة بس للإفادة مو أكتر
ويعطيك ألف عافية عالمشاركة

[خالد النفوري]

أختي بسمة نحنا عم نحكي على حليب سوريا والنبك خصوصاً ويلي مو مغشوش هادا الحليب بكون كتير دسم مشان هيك بينضاف شوية مي
وبالنسبة للون النستلة بعد الضغط طبعاً والعلبة مختومة بني وهو نفس لون مربى الحليب

[●•°BaSmA°•●]

اي أكيد حليب سوريا هو الأفضل بس مستغربة إضافة الماء
ويبدو أنو اللي عم تحكي عليه المطبوخ بطنجرة الضغط هو التوفي لأن المفروض يكون لون مربى الحليب متل لون حليب النسلة الجاهز
واللي بأثر على اللون هي الكربونة لازم كميتها تكون قليلة جدا أقل من رشة بين الاصابع بالطبخ العادي لأنو بتعطي لون للمربى غامق
بس حبيت أكتب تعليقي ورأيي
وبالأخير على حسب العادة كل واحد والو طريقته
يعطيك ألف عافية وبانتظار وصفات جديدة

[@المشتاق@]

يعطيك العافية اخي خالد انا كتير بحب مربى الحليب
الله يخليلك الوالدة

[swan]

يعطيك الف عافية اخي خالد النفوري على وصفة مربي الحليب
كتتير طيب و طريقة سهلة
بس ملاحظة حتى لو كان الحليب دسم ما بعتقد لازم نضيف مي لانو رح ترجع المي تتبخر عن طريق الغلي و الافضل انو نستمر بالتحريك او نستعين بالدحاحل لانو كتتير مفيدة لما يلزق الحيب بالطنجرة
و بالنسبة للفنيليا ف هي اطيب نكهة مع مربى الحليب اما القرفة الي اقترحتا الاخت بسمة ف بعتقد اذا ضفناها رح تروح طعمة الحليب لانو نكهة القرفة قوية كتتير حتى لو ضفناها بكمية قليلة و من جهتي اذا حبينا نغير و نعطي نكهة غير الفانيليا لمربى الحليب انو نحط عرقين عطرة
اي اي العطرة اللي بحطوها بالرز بحليب كتتتير طيبة جربوها ما بتندمو
مشكور اخ خالد و يعطيك الف عافية و الله يطول بعمر الوالدة و يخليلك ياها

[لبابة]

إممممممممممممممممممم صرلي كتيرعم دورعالطريقة
بموت على مربى الحليب الله يسلم ادين الوالدة ويخليلكن ياها

[جوبتير]

اولا شي حابة اشكر الأخ خالد على هالوصفة واللهي من زمان عم اسال عنها وثانيا بقول للوالدة الكريمة الله يخليلنا اياكي يارب ويحفظك ويطول بعمرك واليوم حكيت امام عدة أشخاص لأني قرأتها وما احسنت اجاوب انقطع النت قالولي انهم أكلين منها من تحت ديات الخالة أمو لخالد وطيبة كتيركتير وباذن الله أنا رح اجربها وأكيدرح ادعيلك ياخالة والله يخليكي ويحفظك يارب