●•°حلويات رمضانية °•●

[●•°BaSmA°•●]

السلام عليكم ورحمة الله وبركاته


أكيد رمضان ما بيحلى إلا مع الحلويات الطيبة واللذيذة بعد الإفطار
اخترت كم نوع من حلوياتي المفضلة برمضان وغير رمضان:)بتمنى اختياراتي تكون موفقة



الكنافة



نصف كيلو كنافة
ربع كيلو قريشة (أو جبنة أو قشطة ) أنا ما بعملها إلا بالقريشة
ملعقتين سمنة عربي +3ملاعق زبدة بما يعادل 50 غ
قطر وفستق حلبي للتزين



أما الطريقة :فتسيح الزبدة والسمنة على النار ونخلطها بالكنافة ونحاول أن نخلطها بشكل جيد مع تفتيت الكنافة إلى قطع صغيرة
بعد أن تمتزج الكنافة بالزبدة والسمنة جيدا
نفرد تلتين الكمية على صينية الشوي ونرصها بشكل جيد ثم نضع القريشة ونوزع التلت الباقي




http://www.alnabkvb.net/vb/uploaded/1715_1221567959.jpg


تدخل إلى فرن حامي مسبقا على درجة حرارة 180
ولما يصير لون الاطراف دهبي اللون نطفي الفرن من تحت ونشغل من فوق لحتى تاخد الكنافة لون حلو بهالشكل
فورا نسقيها بالقطر ونقلبها لصينية أكبر ونزينها حسب الرغبة



http://www.alnabkvb.net/vb/uploaded/1715_1221568297.jpg


وهاد الصحن لأحلى رد



http://www.alnabkvb.net/vb/uploaded/1715_1221568369.jpg





أم علي
بظن أنو هالأكلة مصرية وأنا ما بحب اكتب عن أكلة مو معروفة
بس هالأكلة فعلا طيبة وما فيها شي غريب


مكوناتها.....
علبة بف بستري 15 قطعة
5كاسات حليب (ليتر وربع )
نص علبة قيمر أو ممكن أي نوع تاني
رشة فانيلا.. 2كأس شاي سكر
5ملاعق طعام حليب بودرة


مكسرات مشكلة غير مملحة (صنوبر جوز فستق كاجو جوز هند )+زبيب أشقر
نشوي رقائق البف بستري وتكسر وتوضع في صينية كبيرة بايركس
نحمص المكسرات بالفرن ونخلطها مع البف بستري ولا ننسى الزبيب
على النار نخلط الحليب مع القيمر والفانيلا وحليب البودرة والسكر ونستمر بالتحريك حتى يبدأ الخليط بالغليان
نرفعه عن النار ونسكبه على رقائق البف والمكسرات
لا تخافو من كمية الحليب أنو كتيرة لأنو البف بيتشرب حليب بشكل كبير
تدخل الفرن من فوق فقط حتى يتحمر الوجه بالشكل المطلوب
ترش بجوز الهند وتُقدم
ملاحظة :هي الصينية نص عيار فقط





http://www.alnabkvb.net/vb/uploaded/1715_1221568488.jpg


العوامة



أنا ما بحب أعمل العوامة لأني جربتها مرة وما طلعت عوامة:(
وقلت خلص ما عدت جربها وخصوصا انو متوفرة دائما وطعمتها تمام
لكن هالمرة العوامة من مطبخ الوالدة الله يخليها
تابعت معها وساعدتها بالقلي
ولما عجبتني طعمتها ولقيت انو عوامة بتستحق التجريب
نقلت الصور عالجهاز حتى فيد الجميع بهالوصفة



ومكوناتها..



2كأس طحين
ربع كأس نشا
ربع كأس لبن زبادي
ملعقة كبيرة خميرة
رشة خفيفة ملح
كأس وربع ماء



تخلط جميع المكونات وتترك لتختمر(أنا ما كنت هون لصور العجينة:) )
طريقة القلي :
نضع العجينة بالكيس الخاص بالتفريز ونقص الطرف بمقدار سم
نجهز الزيت الغزير للقلي ونجهز القطر والاهم صحن زيت صغير لبل الاصابع لتسهل عملية تشكيل الكرات من الكيس
لا ننسى نلبس كفوف حتى نحمي ادينا من الزيت
لما بيحمى الزيت بنكون مبللين اصابعنا بالزيت البارد ونضغط على الكيس حتى تتشكل عنا كرة صغيرة ونسقطها بالزيت ونحاول تكون حركتنا سريعة
لنلحق نعمل كرات ونقلي ونغطس بالقطر ونشيل من القطر ... يا أما لازم يكون معكن حدا متل بسمة لتساعد هههههه
عم امزح ..شغلتها سهلة والله ..وصحتين وهنا
http://www.alnabkvb.net/vb/uploaded/1715_1221570802.jpg
http://www.alnabkvb.net/vb/uploaded/1715_1221570904.jpg
ما بدي كتر صور بس شوفولي هالعواماية:)
http://www.alnabkvb.net/vb/uploaded/1715_1221570951.jpg



القمح بحليب



الطريقة موجودة على الرابط (http://www.alnabkvb.net/vb/showthread.php?t=23343)


وهي نفس طريقة الالماسية
لكن نضيف قبل النشا
الرز المسلوق والقمح المسلوق
تقريبا كأس شاي لكل نوع
وصحتين وهنا يا رب



http://www.alnabkvb.net/vb/uploaded/1715_1221571374.jpg


إن شاء الله يعجب الجميع
دعواتكم
.

[lwoai]

باسمة اول شي يعطيكي العافية


وتاني شي شكلك رح تكسبي خطيتي :confused::confused:


لاني من كتر ما عم اشوف من هالاكلات ما عدت مستعد اعد هون ولا دئيئة :mad:


يعني بالمشرمحي رح اترك كل شي واسافر:mad:


ورح احملك الخسارة الك :p


يالله واتحملي لشوف شو اخرتها :p:p


بس













































والله الحق يقال


ما شاالله عنك


دعواتي الك بالخير

[عاشقة الشهادة]

والله ماشاء الله عنك وبارك الله فيكي

أما أخي لؤي كيف لكان اذا دقتن عن جد شو بتقول والله انا اشهد كوني زرتا لبسمة ودقت أكلاتا والله الحكي مو متل الدواقة
بالفعل شي طيب وناجح
بتخلي الواحد يصفن مع حالو ويتمنى يطبق كلشي
فيسلم اديكي والله يعطيكي العافية يارب

[§Nosa§]

ماشالله ماشالله...شي بشهي وكلو تمام يسلم دياتك يارب..
هالحلويات طيبة برمضان وبغير رمضان كمان...
والله يخليلك الوالدة وأمهات الكل يارب..عيارالعوامة اللي عاملتيه فيو اللبن زيادة عن العيار اللي بعملو وان شالله بدي جرب هالعيار لأنو أكيد مضمون من مطبخ بسمة..
بس كيف طالعة شكل هالعواماية هيك؟يعني لو بقالب ماكانت ظبطت:pأحياناً بيطلع شي شكل غريب بين العوامات بتصير بس ماصارت معي وطلع قلب متل اللي بالصورة ..كتير حلو..
مرة تانية يسلم دياتك يارب اختيارات رائعة وموفقة وجهد تستحقي الثناء عليه..بوركتِ6

[●•°BaSmA°•●]

أشكركم جزيل الشكر أخي لؤي ..إن شاء الله بتشوف عيلتك عن قريب وبتعملك أكلات أطيب وأشهى من هيك
ما بيحلى رمضان إلا مع لمة العيلة دعواتي الك بالتوفيق يا رب
أختي الغالية عاشقة الشهادة أنا تشرفت بمعرفتك وسُعدت بزيارتك الي وإن شاء الله ما تكون آخر زيارة وتكون هالزيارات متكررة دائما
مو مشان شي بس مشان اللمة الحلوة والناس الطيبين متلك والنعم منك ومن الجميع
نوسا غاليتي بتمنى تجربي وتعطيني رأيك وصحة وهنا سلفا
نورتو الموضوع بهالردود الحلوة
يعطيكم ألف عافية

[عاصم]

يعطيكي الف عافيةيارب

[worod]

ما شاء الله يا بسمة شو هالشغل الحلو وووو
أنا متأكدة من الطعمة من غير ما دوق ومتل ما بيقول المتل
{طب الجرة عتما بتطلع بسمة لأمها}
ومو بس انت شاطرة وأمك كمان والله يخليلك ياها
شكرا كتير

[كنوز الدنيا]

ماشاء الله عنك يا بسمة يعطيك العافية
أنا صار لازم دافع عن العزابية والله كتير هيك حرام :(

لا عم أمزح بس لأني بعرف شو يعني عزوب في هل البلد
الله يرد كل غايب لأهلو سالم أنشاء الله

جد يعطيكي ألف عافية وكتير الوصفات بتشهي وبدي جرب
وأستعين في مطبخك على طول



مع تحياتــــي و سلامي إلك





























ت

[رؤى]

بسمة اي شو هالشغل اي ما تبلي الهي و يسلم هالايدين و يعطيك العافية
خليكي هيك دائما متميزة باكلات و طبخاتك الرائعة و الطيبة
و كتر من الصورررر خلي هالمغتربين يعانو شوي هههههههههه
لا ترأفي بحالون ابداااااا
الله يقويك
و ان شاء الله كل رمضان و انت بخير

[دموع الورد]

ماشاء الله لا قوة الا بالله شو هالشطارة يا بسومة انشاء الله ما تبلي يعطيكي العافية
ام علي بعرفها وتشرفت بمساوتها وهي طيبة كتير
بس رح جرب طريقة العوامة تبعك لانو بدي ياها تطلع قاسية ومقرمشة متل تبع الشام بس ما تطلع هيك مدري ليش رح جرب وقلك النتيجة

[ALEN]

Thank you Sooooooo:):):):) much
My favorite one is AWAM:pA
AL:):):)EN

[●•°BaSmA°•●]

شكرا لكم جميعا
شكرا لك أخ عاصم
ورود الغالية فعلا أمي هي المعلم الأول بالنسبة الي بالمطبخ الله يخليها ويطول بعمرها
رؤى شو قصتك مع المغتربين :) أهلا فيكي منورة موضوعي
كنوز الدنيا شكرا لك
والله يعين المغتربين ويرجعهن سالمين غانمين
دموع الورد أختي الغالية ان شاء الله العوامة بتكون عند حسن ظنك المهم الخفق بشكل جيد لحتى تعطيكي القرمشة وصحة وهنا يا رب
ألين الغالية جدا جدا صحة وهنا يا البي العوامة أطيب شي :)

[Destiny]

تحلى ايامك يا رب
بس حظي ما بشوف أكلاتك مع صورها إلا بالنهار
ورح اعتبر حالي ما شفت شي لبعد المغرب
جد يعطيكي ألف عافية بسمة لأنو مواضيعك دايما متعوب عليها

[●•°BaSmA°•●]

شكرا لك غاليتي وأختي العزيزة
وصيام مقبول إن شاء الله

[M-R-M]

إن شاء الله زكروني رمضان القادم أعطيكن طريقة تحضير حلاوة الجبن

[●•°BaSmA°•●]

رمضان القادم؟
تسمعنا بحلاوة الجبن ونستنى لرمضان القادم !!!!
بانتظار حلاوة الجبن بأسرع وقت لتنور مطبخنا لأنو كتير عزيزة على ألبي
وجربتها مرة لكن ما نجحت 100 %
ممكن أستفيد من طريقتك وأعرف الغلط وين,
لا تنسانا أخي الكريم
ومشـــكور سلفاً

[M-R-M]

تكرمي أخت بسمة
بتركبي السيارة وبتتوجهي شمالا صوب حمص و......!!!!!
بتوقع السبب أنها ما نجحت 100% هو نوعية الجبنة ,لأنو حلاوة الجبن بدها جبنة مسحوبة الدسم وتكون مختمرة
و هي صعب نلاقيها بالنبك
فشو النوع اللي استعملتيه؟ حتى أقدر أقلك الطريقة المزبوطة....

[●•°BaSmA°•●]

يا ريت كنت بسوريا
كنت ما جربتها من الأصل
أنا استعملت الجبنة الموتزريلا العادية على حسب وصفة أخدتها من النت
العجينة ما مسكت معي بشكل جيد
اتوقعت انو كمية الجبنة لازم تكون أكبر
إذا بتعرف نوعية جبنة ممتازة هون بالسعودية يا ريت تخبرني شو اسمها بكون شاكرة الك
ولا تنسى كمان طريقة القشطة من بعد إذنك وإذا بتكون طعمتها قريبة لطعمة القشطة اللي بيستعملها أبو اللبن بكون ممنونة
يعطيك ألف عافية

[M-R-M]

كمان تكرمي
بحاول دور على نوعية من الجبن تكون مناسبة, هون بالرياض
وبالنسبة للقشطة في نوعين:
1-القشطةالبلدية:عبارة عن حليب بنضل نغليه على نار هادية وكل ما طلعت القشطة عالوجه بنشيلا
و بنحط القشطة بالبراد بتطلع أطيب من قشطة أبو اللبن, بس كل 10 كيلو حليب ليطلعو 1 كيلو قشطة
2-القشطة المطبوخة:بس يغلي الحليب بنحط نص كاسةسكر مع كاستين سميد ناعم لكل لتر حليب وبس يجمدو شوي بنطفي الغاز وبنحطلن شوية ما زهر وما ورد
وممكن إضافة القيمر الها بعد ما تبرد بتطلع أطيب

[Traveller]

شكرا Basma على الحلويات المميزة ...صار عندي فضول لآخر صنف يالي بشبه الألماسية بس فيه قمح ..شكلو طيب..
و بعدين MRM يفضح حريشك ..حاج تشهينا ..أنا بموت بحلاوة الجبن ..و هون يالي بالسوق ما بتتاكل ..مو متل عنا بسوريا..سقى الله يا محمد وقت جبتنا على بيت الشام (أيام الدراسة) ..وقتها جبتنا ما بعرف كم كيلو حلاوة جبن من حمص ..و قعدنا عليهن _6 شباب_ قام ما ضل شي ...ما شاء الله ..يغزي العين

[●•°BaSmA°•●]

أهلا بأخي المسافر
القمح بحليب نكهته طيبة ومفيد جداً

يا ترى شو صار بحلاوة الجبن أخي محمد؟
بعدنا عم نستنى:)

[حذيفة ابو محمد]

والله شهيتيني بس بدي شي كم كيلو عومي وشي كم كيلو رز بحليب هههههههه لاتصدقي
ويسلمو على الوصفوت الطيبي

[تيم الله]

مشكرة مبين انو كل اكلاتك ماشاء الله طيبين ومنظرن حلو بس بدي اسئلك اديش العوامة بدا وقت لتختمر ومشكورة

[●•°BaSmA°•●]

أهلا بالأخ أبو محمد يا ريت في أبعت لكل المنتدى عوامة ومن كلو :)
شكراً لك

بالنسبة للتخمير أختي تيم الله غالباً بتحتاج حوالي نصف ساعة في الجو المعتدل لأنها سائلة وما بتاخد وقت يعني على حسب الجو لما تلاقي العجينة صارت الضعف تقريباً بتكون جاهزة للعمل
أي سؤال أو استفسار اسأليني وبأي وقت وإن شاء الله بتنجح معك وألف صحة وهنا

[السلطان]

بدي اسئلك عالعوامة اديش بتتركي العجينة لتتخمر يعني المدة وبتطلع العجينة مرقة ولا كيف وشكرا سلفا

[السلطان]

عفوا هلا قرات التعليقات شكرا كتير ماتواخذيني

[●•°BaSmA°•●]

أهلاً بأخي السلطان
إن شاء الله بتجرب العوامة وبتكون عند حسن ظنك
صحة وهنا سلفاً.

[BLOOD-HERZ003]

الأكلات كلها طيبة بس أكلة أم علي أول مرة بسمع فيها مشكوووووورة بسمة