مشكلة البنت ..... بالنبك

[بوابة السماء]

السلام عليكم اخواتي الأعضاء



أنا بهالموضوع عم أطرح مشكلتي ومشكلة البنات بالنبك ولأخص طالبات الدراسة ...............

فمثلا البنت بتدرس طوال تسعة اشهر متواصلة وبتبذل كل جهدها على أمل انو تعوض بالصيف كل شي فاتها وقت الدراسة .......................... !! وبعد ما تنقضى الأشهر التسعة

تجي البنت تفكر بتنفيذ المشاريع اللي فكرت فيها أوقات الراحة في سنة الدراسة ؟؟؟ بتقعد تواجه الواقع فما بتلاقي شي ؟؟

مثلا : بالنبك ومع احترامي الها ما في أي حديقة أو منتزه بينراح عليه هاد أولا ... تانيا بتفكر تروح عالمسبح بتلاقي حالها بطريق متفرع لفرعين الأول بوديها لمسبح موقعو مو مناسب ومو نضيف كفاية < دون ذكر أسماء > أما الطريق التاني بوديها لمسبح مو منظم وصغير ومعجوق وما بتقدر تحط رجلها فيو

ولمن بتلاقي حالها وصلت لطريق مسدود بتلغي فكرة المسبح وبتفكر بشي تاني على سبيل المثال مدينة ألعاب وعنا ما في غير مدينة وحدة والألعاب فيها معدودين وبأي حديقة عامة بغير مناطق بكون فيها الألعاب نفسها هاد أولا تانيا انو هي موقعها مو مناسب

بتلغي الفكرة التانية وبتفكر انو تروح هي ورفقاتها على شي مطعم او كافتيريا أولا المطاعم معدودة وأغلبيتها مواقعها خطرة ومو حلوة زيادة أما الكافتيريا ت معدومة واذا مو معدومة بتكون كلها شباب........... ولمن بتفكر انو تسجل بشي معهد تسلية موسيقا . رسم فنون قتالية < رياضات > ما بتلاقي كل شي بتطلبو مثلا مو كل الآلات في ناس بيقدروا يعلمو عليها وبدها تنزل تشتري الآلة من الشام والسبب معروف!!!؟؟؟ وبالنسبة للرياضة شرحو ؟؟

واذا قررت انوا تروح هي ورفقاتها يتمشوا بلحقهن شي موتور بعوفهن التنكة!!! واذا مرقت من شارع مرتين بتصير علكة بتم الناس وأحيانا البنت لأسباب تافهة وما بتكون دايرة بالها الها بيتهموها الناس انها مايعة أما الشب شو ما عمل ما حدا بيقلوا شي وخاصة بعد صدور متل خاطئ < الرجال ما بيعيبوا شي >

لأ ومو بس هيك لأنو الشباب بهالأيام اذا شي بنت ما عطتهن وجه بيصيروا يألفوا عليها قصص وحكايا

وهاد حال البنت بمجتمعنا بالوقت الحاضر رجاء قولوا لي وين بدي روح بحالي !!!؟؟؟:confused:




ودمتم سالمين....!!:D

[فـراشـة الـربـيـع]

اول شكرا على طرح الموضوع اختي بوابة السماااء
موضوع جميل ويستاهل للنقااش

بس انا مو من حقي اناقش بهل موضوع الانه ما رحت للنبك ولا عشت فيها ولا ادري بشي عنها

ثاني شي بالنسبة للشبااااب وين ما تروحي نفس الشي ... اقصد جملتك
لأنو الشباب بهالأيام اذا شي بنت ما عطتهن وجه بيصيروا يألفوا عليها قصص وحكايا

موضوع حلو ويستاهل انه الاعضاااء يشاركو فيه..

تحياتي

[mostafa_k]

بعين الله بلدنا كرها بهالموضوع

[smartcat]

حلول بديلة

1: المنتدى و المشاركات و محاولة ابتداع مواضيع جديدة لم تكتب من فبل
2: سوي جمعية أنت و رفقاتك أو أنتي و بنات أعمامك و خالاتك بعد موافقة الأهل طبعا و أكيد وحدة من رفقاتك أو أقربائك عنها كروم في السقي . بتحجزوا الكروم كل أسبوعين مثلا (بعد موافقة الأهل و بتروحوا)
3: حاولي اتلازمي أمك في زياراتها و علاقاتها الاجتماعية و لا مانع في جمعيات النسوان اذا اقدرتي
4:دورات كومبيوتر و لغة
5:تعلمي كم طبخة من أمك
6:صيروا اطلعوا أنت و اخواتك و أبوك و أمك مثلا على أي منتزه أو مطعم في النبك في كل أسبوع
و أكيد في كتير حلول بديلة عند الأعضاء
سلام

[الكعفور AKJ]

وأحيانا البنت لأسباب تافهة وما بتكون دايرة بالها الها بيتهموها الناس انها مايعة أما الشب شو ما عمل ما حدا بيقلوا شي وخاصة بعد صدور متل خاطئ < الرجال ما بيعيبوا شي >
يا لطييييييف انا شو بكره هالمتل هاد والله يا بوابة السماء هاد الموضوع دوما بناقشو انا وصحابي المقربين يعني يلي بيفهموا
المهم انا معك في هالموضوع والحلول يلي عطاكي ياها مصطفى حلول رائعة وبتجنن واهم شي فيها دورات الكمبيوتر واللغة وعندك كمان انو تتعلمو الطبخ من الوالدة لانو انا كمان بجاول اتعلم الطبخ بيلزم ههههه
ومشان موضوع الشب يلي بكتر حكي انا برأيي انو كل بنت بتعرف حالها ومو من الضروري تسمع شو عم يلعي هالشب يعني تسمع وتسطح طالما هي عرفانة حالها
وممكن تقولي شو مشان الناس ؟؟؟ يعني ممكن تنتزع سمعة البنت
هو في شي من هالشي بس كمان طالما الاهل بيعرفو شو بنتن كل الناس وحكين ما لازم يهمن
وفي موضوع الخروج مع الاهل يعني الاب والام والاخوة شي ضروري ولازم
يعني عنا بالنبك صدفة لحتى تلاقي بنت هي وابوها متفاهمين كتير
وازا كانت متفاهمة هي وامها مو لدرجة ما بكون التفاهم لدرجة الصراحة الكاملة يعني الام بتكون مشغولة لدرجة انو البنت بتحس انو امها ما عندها وقت لتسمعها
بالعكس بنصح كل بنت تتقرب من امها وابوها وازا تقربت من ابوها بكون احسن يعني تحاول تصير هي وابوها اصدقاء ويناقشو جميع الامور بين بعض
وعكلن بدك تطولي بالك لانو هي مجتمعنا وبدو زمن طوييييييييييل حتى بتغير وشكرا لموضوعك

[فراشة butterflyالقمر]

بوابة السما انتي حبيبة البي وبس ماعندي غير هالتعليق لأنو اي تعليق تاني ماحيفيد بشي ومشكورة لأنو هلكونا يعلقو عالبنات لازم نحكي نحني كمان
وانا مو مع سمارت لأنها نشاطات بديلة مملة جدا جدا والله بيعين المجميع

[بوابة السماء]

شكرا كتير الكن بس انا مع فراشة القمر انو شغلة المعاهد صارت مملة وكل شي بيعطونا ياه منعرفوا بس هي متل ما قال سمارت ما عجبتني اني ضل مع امي ورفقاتها او اني اتعلم شي طبخة لانو لاحقين ومتل ما قال الكعفور عن اني ابقى مع أهلي بصراحة مو كتير حلوة لانو الواحد ايا كان بحب الحكي والروحة مع رفقاتو اكتر
وانا سألت عن نوادي لتعليم كرة اليد او القدم بس كل واحد بيقلي شي بالنهاية شكرا كتير الكن ودمتم سالمين

[الاحساس الغريب]

لا تعليق
بلا ما حكي احسن

[سواد الليل]

بصراحة كنت عمحاول أتناسى هالموضوع
لوين بدنا نروح وشو بدنا نعمل
يلا بنروح عالمزرعة بنخلص مزرعة بنرجع عالبيت وبعدين من البيت عالمزرعة
يعني أنا برأي أنو مافي حل غير أنو الأهل يعملوا رحلات ونزهات لخارج النبك
لأنو المنتزهات يلي فيها ماشاءالله مئطعة بعضها
ما بعرف أحسن شي بعين الله
مشكورة أخت بوابة السماء

[ياسمين زمزم]

السلام عليكم
أختي بوابة السماء: أجد كلماتك في طيات السطور و كأن حرقة أصابتك و تظنين أنك وحدك .....

عزيزتي : الفتاة في مجتمعنا لها وضع خاص و كما قلتِ هناك بعض انتقاص لحقوقها أو بالأحرى تهميش لمتطلباتها مقارنةً مع ما يأخذه الشاب
و أنا معك في غالب ما قلته و لست ألومك و لكن لتكوني واقعية بعض الشيء و لتفكري فيما أطرحه عليكِ

ربما أنت طالبة أنهكها التعب و أصابها الملل إلى أن وصلت بر الأمان و نهاية العام الدراسي لتبدأ تعيد ذاكرتها إلى الأحلام التي رتبتها طوال أيام الدراسة و طبعاً ستكون تلك الأحلام أوهام ( و كل ممنوع مرغوب ) تعرفين لماذا ؟ لأنها نشأت في ذهنك في لحظات ملل أو ضغط الدراسة أو حتى ربما الأهل بحرصهم على دراستك
المهم تبدأ العطلة مع انهيار كل حلم واحد تلو الآخر لتتجلى لك الصدمة بواقع المجتمع و هنا لا تريين سوى سلبيته


أختي : المشكلة صراحة بدأت من ذاتك عندما فرقت بين تسعة أشهر و ثلاث أخر
لم لا تجعلين كل أيامك معتدلة بين دراسة و ممارسة هواية و عمل مفيد لغيرك
تساعدين أمك و تزورين الأقارب
نعم الصديقات هن طلبك و لكن لسن كل شيء في الحياة فلربما صديقة تسيء لك أكثر من ذاك الشاب الذي لمته بشدة في كلامك
العطلة الصيفية لم تكن لنملأها باللهو و السهر و الأحاديث وووووووووو
هل من كل ذلك فائدة تجنيها سوى بالنهاية الملل


الحلول التي قدمها سمارت جيدة و( أضيف إليها المطالعة و ليس في المنزل إنما في المركز الثقافي و تعلم فناً من الفنون النسوية التي تسلي و تفيد في نفس الوقت )و لو لاحظت فإنها تتنوع بين العلم و الترويح عن النفس و لكنها لاااااااااااااا تنفع لمن اعتقد العطلة فقط للتسلية لا غير


اعذريني أختي ربما قسوت قليلاً
أتمنى أن تجد كلماتي عندك القبول و لتعتبريها من أختك الكبرى

[بوابة السماء]

شكرا كتير حبيبتي يمان بس السنة ما كنت فاضية لفرق بين الدراسة واللعب كان عندي شهادة وبعدين انا كل الصيفيات الماضية كنت اقرأوطالع بس حبيت غير شوي من الروتين بس للأسف اصبت بخيبة أمل كتير كبيرة هففف يلا ما شي الحال
رح اصبر لانو ان الله مع الصابرين

[Qassaam]

مني إلك تحية خاصة أختي بوابة السماء

بجد مش مزح ... موضوع لم يخطر ببالي وشكراً لك لأنك طرحتيه بطريقة سهلة وواضحة حملت جزءاً من شخصيتك

عجبتني حلول أخي سمارت ... وأيضاً لفت نظري التعليق المنطقي للأخت يمام

لكنني أعتقد فعلاً أنك أنت أكثر الناس دراية بوضع ولا يوجد أحد يستطيع اعطائك وصفة جاهزة لهذا الأمر ............. لكن أنتي فكري وقرري ونفذي ... والله ايوفقك.

ورسالة مبطنة إلنا نحن الشباب
"رفقاً بالقوارير"

وأهلا واسهلا فيكي بين أهلك وأخوتك

[الكعفور AKJ]

يا بوابة السماء انا برأيي انو هالشي هاد من اكبر الاغلاط انو الواحد ما يحكي مع اهلو لانو مافي حدا بالدنيا بيفهم الولد اد الاهل ما بعرف عاد شو رأييكن انتو
انا هاد رأيي

[هادي نديم]

مرحبا يا جماعة :
نعم اخت بوابة السماء
هذا هو مجتمعنا للأسف ولكن اللوم لايقع على الشب فقط بل ايضا على البنت
وعلى الاهل ايضا
نعم الشب بكون عالموتور او بالسيارة وبعوفها التنكة للبنت بس كمان بالمقابل شوفي البنت شو لابسة خلت هالشب يتجرأ ويلحقها ليس كل الشباب ضعيفي النفووس وبالمقابل ليست كل ابنات من متتبعي الموضة على قولهم
بس للأسف برجع وبقول هذا هو مجتمعنا اللي فيه الكل مظلومين ليست البنت فقط
...
اما بالنسبة للأماكن العامة معك حق ما في مكان بيصلح لاي بنت أو حتى شاب يروح عليه وهذا اللي بخلينا نروح عالشام ولا على اللاذقية او لهون او لهون..........
بكل الاحوال نعم في ظلم لكلا الطرفين بس من كل قلبي البنت عنا مظلومة اكثر

[بوابة السماء]

شكرا كتير الكن ردودكن كانت حلوة ومتشابهة شيئا ما وبالنهاية كل واحد عطى رأيو
والله يعطيكن العافية

[الكعفور AKJ]

يا هادي نديم معليش اسمحلي اقلك ولا تواخذوني جميع في هالكلمة
انو الشباب يلي خلو البنات يتصرفو هيك طبعا مو كل الشباب بس نسبة 90 بالمية
وتاني شي انو البنت عنا ما عم يكون في الها اهتمامات من قبل الاهل وكمان مو الكل بس نسبة كبيرة كتير يعني الاب مسافر مو عرفان بنتو شبها ولا شو بدها والام مستغيبة يعني ازا مو في الجمعية عند اختها وازا مو هيك بكون همها البيت ونضافتو والعزيل والشغل والطبخ والنفخ
واخيرا واكتر شي دارج عنا انو ما في عنا تنظيم للحياة بكل شي
لك الله بعين الشب عم يعاني والبنت عم تعاني والتنين ما حدا عم يعرف يتعامل معهن
عاد لقيت في الاخر انو كل واحد يشوف شو يلي عم يصير من حوليه ويفكر مليح وياخد قرار حياتو المناسب
ما بعرف عاد شو بصير بعدين
وهاد رأيي وكلمن الو رأي خاص

[ياسمين زمزم]

وتاني شي انو البنت عنا ما عم يكون في الها اهتمامات من قبل الاهل وكمان مو الكل بس نسبة كبيرة كتير يعني الاب مسافر مو عرفان بنتو شبها ولا شو بدها والام مستغيبة يعني ازا مو في الجمعية عند اختها وازا مو هيك بكون همها البيت ونضافتو والعزيل والشغل والطبخ والنفخ


معك يا أخي و هذا موجوووووود و لكن هل السبب عدم حب الأهل للأولاد ؟ طبعاً لا
أخوتي المسألة هي أننا خرجنا إلى النور ... تعلمنا و تزودنا بشيء من ثقافة العصر لنعود أدراجنا إلى البيوت التي نشأنا فيها ليصدم واحدنا في عدم تفهم الأهل له
هم ليسوا على خطأ و لا نحن
الحاجز الذي وُضع بين الابن أو البنت و أهلهم هو عدم القدرة على التفاهم و السبب أن كل منهم لا يرى المسائل إلا من منظوره هو
ألا تلاحظوا أن غالبية الأهل لم يعرفوا من الحياة سوى العمل و الغربة و تقديم المستطاع للأبناء ؟!
لم يدرسوا مثلكم و لم يخالطوا طبقات المجتمع فكانت قدرتهم على التعامل محدودة أو بالأحرى كما تربوا هم تربية العادات و التقاليد
نحتاج إلى مد جسر المودة مع أهلينا و لتكن البداية منا نحن الأبناء

[الكعفور AKJ]

ألا تلاحظوا أن غالبية الأهل لم يعرفوا من الحياة سوى العمل و الغربة و تقديم المستطاع للأبناء ؟!
يعني هي هيي المشكلة انو ما تركولنا وئت ليتفاهمو معنا

[Brave Heart]

لك اقعدو بهالبيت
احسن الشي
بلالكن هالطلعة
عملو مسبح بالبيت وكفتيريا ومطعم ومدينة العاب احسن الشي

[بوابة السماء]

شكرا كتير شرفتونا بزيارتكم الموضوع وحكيكم فيو وجهة نظر كبيرة

[sad smile]

تحمدي ربك اذا في عندك وقت تفكري لوين بدك تروحي
أنا بهالصيف كرهانة حالي <لأنو كل يوم درسين وأحيانا تلاتة > آل يعني تجهيز للتاسع ..
الله وكيلك صايرؤ عطول دايخة وما الي حيل احكي
بس مظبوط كلامك هيك صاير فينا بهالنبك
مشكورة حبيبتي

[بوابة السماء]

نورتي الموضوع آنسة ساد

[قوت القلوب]

اي والله معك حق ما في مطرح يينراح علي

مشكورة حبيبتي كتير

[بوابة السماء]

مشكورين عالردود جميعا
وشكرا قوت شايفة انو معي حق بكل شي قلتو
هفففففففففففففف والله شي بملل لاما هالنت حولتي حولي

[فراولة]

والله يا أختي بوابة الحق معك يعني نحنا البنات مأكول حقنا في هالبلد
وكل شي للشباب بس يالله نصيبنا في الجنة
ومشكورة عالموضوع

[قمر الزمان]

مشكورة كتير بوابة لطرح الموضوع لأنو بالفعل هيك صاير عنّا بالنبك

ومتل ما قالت فراولة كل شي للشباب بس كمان الشب هون مو كتير مرّفه متل غير مناطق يعني الاتنين مظلومين بس البنت أكتر

[بوابة السماء]

شكرا كتير عردودكن كلامكن كلو صح
أهلا وسهلا فراولة وقمر أعضاء جدد بالمنتدى

[pinkgloss]

و الله كلامك درر يا كعفور فعلا معك حق بس في شغلة
إنو البنت مو مقربة كتير من ابوها لانو الاب بيشتغل و بيتعب و ما بيجي لوقت متأخر بس لازم يخصص وقت للبنت
اكيد

و الله هلق كتير من الشباب صايرين ما يتصدقوا لانو عم يحكوا قصص ما لها أساس من الصحة ( بدون ذكر أسم أشخاص طبعا)
بس كمان متل ما قلتكل بنت بتعرف حالها و ما لازم يهمها حكي الناس إذا كانت بنت مليحة

[pinkgloss]

الله يخليكي غير الصورة الرمزية و الله كل ما بطلع فيها بفزع

[بوابة السماء]

أهلين منورة نجمة أنتوا والصورة تبعي هي غيرتها شو بدكون أحسن من هيك
هففففففففففففف