على سيرة....القبقاب!!

[هامور]

القبقاب لغير الناطقين باللهجة النبكية هو رفض البنت لطلب الخطبة من شب .....وله أسماء جديدة مستحدثة مثلا
(خابور) ...وبلغة الشات (بند...)
هذا الموجز واليكم الاخبار بالتفصيل....


صاحبنا زلمي شب سافر على الخليج واشتغل وتعب على حاله جمع قرشين مناح وقرر ينزل عالنبك المحروسة ويختار بنت الحلال ويخطب
حاول يشتري سيارة تلفت الانظار وتكون على قد امكانياته ..السيارة ضرورية للي ناوي يخطب وأصبحت شئ اساسي للعريس .......مانكن بالطويلة
بعد وصوله بالسلامة وفي جلسة رواق مع الاهل أعلن عن رغبته بالخطبة وطلب من الأهل يدوروا على عروس وحدد المواصفات المطلوبة كالاتي
بنت عالم وناس(طبعا هي كلمة الها اكثر من تفسير )
طويلة
بيضة
شعر اسود سابل
عيووووون كبار
وعندها بدأ كل واحد من العيلة يدلو بدلوه ويقترح اسماء وبنات على صاحبنا وبدأ المارثون في البحث والبحبشة بالسراج والفتيلة عن بنت الحلال....
الاخت شافت بنت بعرس صديقتها واستفسرت عن عيلتها وبيتها وعجبتها مبدئياً...
كالعادة اتصلوا وقالوا جايين نشوف بنتكن وباليوم المحدد صاحبنا ماكذب خبر زبط حاله عالخيط والبيكار ولبس وتعطر وأخد امه وأخته وذهبوا يعني راحوا على بيت البنت....
وهون لازم نقدر موقف الشب .بيت أول مرة بيدخلوا ووجوه غريبة ماسبق ان شافها .وبدو يحاول يترك انطباع جيد عن نفسه....دخلوا وقعدت أمه على يمينه وأخته على يساره ومقباله أم البنت وعمتها عم يزينوا من فوق لتحت بعيونهن
وصاحبنا ماسك شكلة المفاتيح وبحاول يبتسم وبنفس الوقت بفرغ شحنات التوتر والخجل بالمفاتيح ولكن احمرار خدوده وعرقه المتساقط ورجفت اديه بتكشفه...
وبعد لحظات التوتر الاولى تدخل العروس ويزيد التوتر لل220 فولت يعني بصير توتر عالي(طبعا كمان موقف البنت لاتحسد عليه)...
وهون كل طرف بحاول يسرق نظرة خاطفة على الطرف التاني ...كمان بلا طول سيرة
بتخلص الجلسة الاستكشافية وبيستأذن الشب وأهله وبيطلعوا وبودعوهن كما استقبولهن بحفاوة وترحيب...
بالسيارة ببلش الحديث من نوع تاني بعد ما بحكوا الأم والأخت عن مخمل الديوانية ولون البرادي وغراض المتة والضيافة والثياب وووووووووو بيسأله الشب ها شو رأيك؟؟
امممممممم بيصفن صفنت المتأمل المفكر الفيلسوف العبقري وبعد فترة بيستجمع انفاسه وبقول:سمينة شوي مو
....(.أمه وزنها 110 وبنتها اقل بعشرة كيلو)بردوا عليه اي معك حق!!.....وبتنتهي قصة اول بنت وبتبلش قصة التانية بسيناريو مشابه وأسباب الرفض تترواح بين..قصيرة شوي...شعرها مجعد..ما حبيتها....والخ...
طبعا ليس هذا مربط الفرس فمن حقه ان يختار ما يناسبه ويوافق هواه يبقى الامر قسمة ونصيب ولكن والنتيجة ستاتي لكم بعد قليل ...

وجد البنت التي يرغب وأعجب بها وطلبها للخطبة وانتظر يوم من اصعب أيام حياته جاءه الرد كالصاعقة
...ما الك عنا نصيب....
عصب وبربر وليش شو ناقصني وشو بدهن احسن من هيك
ونموذج تاني ببطل الخطبة من اساسها وبيزعل وبسافر مقهور وكمان في شباب بصير بدها تتزوج حياللا المهم تغيظ البنت وقس على ذلك من أمور تحدث....
وهنا أهمس في أذنه برقة وأقول:يا أخي بما انك سمحت لنفسك أن تختار وبما أنك أعطيت قبقاب لبنت أو اكثر وهو فعلا كذلك لمن يدرك نفسية البنت عندما لا يرجع الشاب اللذي رآها وما يتركه ذلك من أثر فيها.....
فتقبل بروح رياضية أنك لم تكن على مزاج البنت التي طلبتها انت ولا تكبر الموضوع فهو شقفت قبقاب والا شووووو

[Tiger_Hacking]

احييك من كل قلبي يا هامور
اخي الهامور كلامك صحيح لا غبار عليه
يلي حرق قلبي اكتر واكتر
لما شب تقدم لبنت ما وافقت فيو ومعتبرو كنت من افهم شباب النبك
طلع هو وقرايبينو يحكو عليها لانها ما قبلت فيو فعلا شي عيب
عملو البنت متكبرة و و و و على كل حال خليها بالقلب تجرح ولا تطلع لبرا وتفضح لانوا لموضوع في نظري حساس شوي

[شروق]

سلامات
يا هامور يا هامور رفقا" بالجميلة موضوعك جميل جدا" جدا" جدا" بل رائع
نعم أخي الخاطب كما يقلو هامور عليك بالروح الرياضية وليس تفضلا" منك على البنات ,وأكثر من ذلك وددت القول
لماذا الزعل ؟ كل فتاة لها راغب وكل شاب وله راغبة
عادي ,و إذا كان الشاب واثقا" من نفسه لن يهمه وسيحترم اختيار العروس
والعروس أيضا" لا ينبغي أن تنزوي في زاوية البيت وتبكي وتدعي على المحروس عريس الهنا
ولكن هناك قضية خطيرة
كثير وليس كل ...كثير من العرسان وخصوصا" هذه الأيام تكون طلباته يعني تعجيزية ...حبذا لو نظر الشباب هذه الأيام إلى طبيعة الفتاة وثقافتها (عن الحياة يعني وليس شهاداتها فقط)وإلى ثقتها بنفسها قبل الشكل وهي جميلة على كل حال الفتاة
فالكثيرون يأتون من الخليج وغيرالخليج لخطبة أحلى بنت في النبك وجميعهم يخطبون نفس الفتاة وأحيانا" في نفس الوقت فماذا من أجل ؟؟؟

[المثنى]

احسنت هامور هذه كلام صح بس في شي بدي اجلب الانتباه اليه
ان الانسان من بدو يختار يختار الزوجه الي حتسكن جنبو العمر كلو مو يقعد يمعن بعفش البيت تبعهم وله اغراض المتي لان هذه قد يكون اصعب اختيار في حياته .
هذه امر ؟ الامر الثاني ان الانسان يبقى من معدنه يقاس كل انسان بمعدنه وأصله يبان
في شغله اخيره احب الفت النضر عليهه وهي التلاعب بعواطف الاخرين مثل منجرح هوه من البنت رفضتو المفروض يحس بلي حيرفضهه وينسحب منهه لو مكان بدوياهه بطريقه الطف شوي

[سود العيون]

بسم الله والرحمن الرحيم

والصلاة والسلام على أشرف المرسلين

أخي العزيز .. لن أبدأ في ردي هذا أن أشكرك وأكرر ما سيقال

نعم قبقاب .. لقد نسينا بل تناسينا الكثير من مبادئنا في هذه الأيام

وكلامك أخي العزيز لا ينطبق فقط على الفتاة بل على الشاب أيضا

الكثير منهم هذه الأيام عندما يغنيه الله من فضله او حتى يحصل على شهادة صار في شي مليون واحد ببلدنا معو متلها

يرفع رأسه للسماء عاليا (( ويا أرض اشتدي ما حدا قدي ))

وكإنه لا يوجد مثله أبدا

ويصل لمرحلة الخطبة .. ويصبح يتشرط عاد

(( بدو ياها طويلة .. لا لا مربوعا )) ومعها باكلوريا كمان لإنو مستواه العلمي ما بيسمح

وكمان مو مشكلة لو كانت مو حلوة المهم أهلها يكونوا ولاد عالم ورصيدن بالبنك مدري كم مليون

لم يعد هناك أساس للارتباط وما سببه ولماذا أصبحنا فقط بنفكر بالسيارة ومدري شو \

وكلامي هذا بينطبق عالطرفين

أرجوا أن نعود ونفكر شوي بعقل أفضل من العرس لمدة شهر والطلاق بهد شهر ونص

هذا لو صار

ومشكور جدا ولي عودة حسب الردود



والمشكلة ان الطرفين يخسرون الكثير .. ومجتمعنا في منطقتنا حصرا .. يفرض الإقتناع بمثل هذه الأمرر

لأن الموضوع مميز ويحتاج نقاش من كل الأطراف تعطيه حقه ...

[Qassaam]

حيالله ... بالعزيز هامور
موجة الخطبة والزواج مجتاحتنا هالمدة ... الله كريم وربي يوفق الجميع.

أنا معك أن من حق الجميع الاختيار وايجاد نصفه الآخر المناسب له .... والحالات التي تفضلت بها صحيحة ... لكن مشاكلهم كانت نتيجة لطريقة اختيار النصف الآخر

الأمر الذي نقوم بمحاربته في مجتمعنا الصغير وفي أي فرصة قد تسنح لنا هو النظرة السطحية و(السخيفة) للخاطب ، والتي ترتكز على أساس الطلبات المادية التي لو نظرنا لها فعلياً ، نرى أنها تشرط أطفال صغار لم تنضج بعد
وعلى سبيل المثال:
1 : والنعم منك ومن خلقك ومن أهلك ، بس بدي لبنتي مهر مليون وصيغة 100 ألف عجبك عجبك وإذا ماعجبك الله معك.
2: مابدنا منك شي نحنا المهم نشتري رجال وقبل العرس بشهرين بدنا بيت وغرفة نوم حفر و سيارة وأمك ما تجي لعنا وبدي أمي معي بالسعودية...و...و...
3: و...4...ووو .............إلخ

هذه أمور موجودة فعلاً وأصبحت ظاهرة مستشرية عند رأي البعض .... وفي هذه الحالة تغيب فكرة قدرة الشباب أو عدم قدرتهم لأن هذه الشروط تدل على خلل كبير بالتفكير يجب التوقف عنده

فهذه الحالات التي ننتقدها ونتمنى تغيرها

لكن الاختيار هذا حق لكل شخص ، على حسب ذوقه وتفكيره .
ومتابع معكم إن شاء الله .

[smartcat]

لكل شاب فشل في الارتباط بمن أحب أو فتاة لم ترتبط برجل أحلامها
بقول
عسى أن تكرهوا شيا و هو خير لكم و عسى أن تحبوا شيئا و هو شر لكم
عاد اترك الأمر لربك
ممكن تحب وحدة لحد الجنون و تعمل المستحيل لتوصلها و بعد الزواج تقعد تبربر و تقول : أنا شو الخلاني أتورط هل الورطة
وممكن تحب وحدة لحد الجنون و تعمل المستحيل لتوصلها و ما يكون مقدر نصيب لأنو الله بحبك و مهيئلك وحدة أحسن و أفضل
عاد خلي الشغلة لربك
مشكور على الموضوع

[دقة قلب]

مشكور أخي الهامور موضوع قيم جداً..
طبعاً كمان من حق الشاب اختيار شريكة حياته وأيضاً من حق الفتاة ذلك..
ولكن حبذا لو يكون اختيار كلاً من الطرفين على أسس ومبادئ غير هذه التي نراها..من مال وذهب وترف وتبذير وجمال ووووإلخ
أي أن يكون شروط كل منهما مقبولة وباعتدال
صحيح من حق الفتاة ان تعيش بمنزل مستقل ولكن ليس من الضروري ذلك العفش الغالي ووووماالى هناك من تلك الامور
اعرف انه نحن لسنا بصدد هذا الحديث ولكن بعض النقاط تجر لنقاط ثانية
وماأريد قوله هو ألا يكون عدم قبول الشاب بفتاة او الفتاة بشاب نقطة تجر الى الزعل والضعف فليست هنا نهاية الدنيا ولا ننسى أن ذلك قسمة ونصيب كما نعلم..ولكن ماأود قوله هو أيضاً عندما ترفض الفتاة شاباً ليس من الضروري أن تصرع الدنيا _ان صح التعبير_بأن فلاناً طلبني وأنا رفضته وخاصة تلك الكلمات مثل عطيتو قبقاب ومابعرف شو لأنه تذكري أختي قد يقع أخوكِ بنفس الموقف قد ترفضه فتاة ..
وأنت أيها الشاب إن لم توافق عى فتاة فتح أهلها باب بيتها لاستقبالك ولستر ابنتهم فليس من الضروري أن تنشر قصة رفضك لهذه الفتاة فتذكر أن أختك معرضة للرفض أيضاً...
هذا ماأريد قوله
ومشكور اخي مرة ثانية بارك الله بك وبانتظار جديدك..

[توفيق التلا]

مرحبا مرحبا
أستاذ هامور

"مدري ليش نخزني هالموضوع"

ياسيدي ربما نحن نحمل القبقاب أكثر من وزنه ولولا ذلك لما كانت هذه المشكلة
ولو أنن كل منا آمن بالنصيب لزالت فكرة القبقاب ولرضي فلان بفلانة دون أن تكون عدة المتة من السعودية.... و السيارة (( مانها مدخنة ))

مشكور هامور

[هامور]

السلام عليكم

مشكورين كلكن على الردود والاضافات

وبدوا كلنا متفقين على انه في سلبيات عم تصير ابتداءا من طريقة الخطبة

وانتهاءا بان الشب لا يتقبل فكرة رفضه
واحيانا يختلق القصص والاشاعات وهذا لا يجوز ابدا وليفكر قليلا بان له اخت قد تتعرض لنفس الموقف اللذي لن يرضاه بالتاكيد

جميع الاراء تشكرون عليها والله يوفق الجميع
ويرزق كل انسان على هوى نيته

كل الشكر لكم

[أبو مصطفى]

السلام عليكم

لك ياهامور ما بدك تبطل مشاكل

حتي القبقاب ما خلص منك ولقيتلو أعزار شو قصتك هيك بتسوي العزوبية

يا اخي ما بدك تكون معنا لا تكون ضدنا

نحن الشباب دائما نحب المّر ولا نحب الشيء السهل

ودمت سالما ً

صحيح

ماهو عدد ما أكلت من القباقب

ويعطيك العافية

[هامور]

حبيبي ابو صطيف انا الحمد لله لا طعميت ولا أكلت قبقاب بس العترة عليك

يا مسكين لهلء راسك ورمان وكل الخوذ اللي اشتريتهن ما نفعوك هههههههههه

المهم لقيت طريقة منشان الشباب ما يدايقوا

اهل البنت يصبغوا القبقاب بلون ذهبي ويحطوا بعلبة فاخرة ويبعتوا للشب

يمكن هيك ما بينكسر خاطره هههههههه

شو رايكم

هلاااااااااااا بالكل

[سومر مالك]

مرحباً بالهامور

القبقاب بحد ذاته ليس مشكلة

وقد علمت من مصادر غير موثوقة أن أصل تسمية قبقاب جاء من دمشق

حيث أن المتقدم بعد أن يأتي للزيارة الأولى وتراه العروس ويراها وفي حال لم تُعجب العروس بالمتقدم كانو يضعون قبقاباً على عتبة باب المنزل
وحين خروج العريس الطالب يرى القبقاب على الباب فلا يرجع
وذلك تفادياً للإحراج من قول لا

والمشكلة بالقبقاب ليس بمبدأ الرفض فهو نصيب

بل من المحيط

1- شباب يجعلونك حديث السهرات ومَدعى للسخرية
2- أناس يزاودون عليك ويقولون من الأساس لم أرد لك هذا البيت
3- بعض من كان يمدحون لك بالفتاة أصبحوا يذمونها بنفس الأمور التي مدحوها بها


كل هذه الأمور تجعل من القبقاب وكأنه كارثة

أما من ناحية طلبات الشب والفتاة فهي بحر من التنوع ومحيط من التشكيل فلا يمكن حصرها ولا عدها

[أبو مصطفى]

السلام عليكم من جديد

لك هومور كلامك عسل مدهون بقشطة ما بقدر ما اوقف لو بإستعداد


والمهلب الغالي جبلك الصحيح

على راسي الشباب

[Qassaam]

على روسي الشباب جميعا

لهيك فيه حديث شريف بيقلك أخي مهلب
((أسروا الخطبة وأعلنو النكاح))

يعني مافي داعي كل الحارة و(رفقاتك) يعرفوا أنك رايح تخطب.... مشان ما يصير فيك متل واحد بزمانه.

[الشبح]

طيب

المشكلة تتشعب دائماً

ولكن دائماً إذا نظرنا نظرة في العمق سنجد أن أصل أسباب المشاكل
التي يتعرض لها الشاب أو الأهل أو الفتاة بما يخص بموضوع الخصة
دائماً يشير إلى مدلول واحد.

وهو تغير النظرة التقيمية والرؤى في المجتمع
أي أن جذور المشكلة مرتبطة بالمجتمع وتصوراته وإدراكه لمعنى الحياة الزوجية
ومعنى الزواج أو الارتباط أصلاً ..
سواء أكانت نظرة الشاب عند تقييم فتاة ...او نظرة الفتاة عند تقييم عريس
او نظرة أهل الفتاة أو أهل الشاب ...

اخي الهامور أنا من وجهة نظري بما يخص الشاب وطريقة بحثه عن الفتاة
معترض (ومن زمان ) عل طريقة ( الشوفة والدوران بين البيوت)...
وهذه الطريقة برأيي من الأصل خاطئة ....مع إدراكي لصعوبة اختيار الفتاة
لمن هو مغترب ....
وبضل هالشي رأي شخصي و أكيد معارض بشدة من قبل البعض
وسبق وطرحته بموضوع كجزء من سلسلة مكونة من حلقتين

ألاولى :
@@ حوار بين القبقاب وشاب يرغب بالزواج @@
http://www.alnabkvb.net/vb/showthread.php?t=9643&highlight=%C7%E1%DE%C8%DE%C7%C8+%C8%C7%E1%D2%E6%C7 %CC (http://www.alnabkvb.net/vb/showthread.php?t=9643&highlight=%C7%E1%DE%C8%DE%C7%C8+%C8%C7%E1%D2%E6%C7 %CC)

والثانية : التي ترتبط بموضوعك وبرأيي في هذه الطريقة من قبل الشاب:
@@ العريس النبكي يبحث عن فردة كندرة سندريلا @@
http://www.alnabkvb.net/vb/showthread.php?t=9683&highlight=%C7%E1%DE%C8%DE%C7%C8+%C8%C7%E1%D2%E6%C7 %CC (http://www.alnabkvb.net/vb/showthread.php?t=9683&highlight=%C7%E1%DE%C8%DE%C7%C8+%C8%C7%E1%D2%E6%C7 %CC)


ولن أطيل ...لأاني إن بدأت فلن أنتهي

ولكن أقول :

أصعب ما يواجه الشباب اليوم هو موضوع الخطوبة وفي النبك أكثر بكثير من غيرها

( في النبك أكثر بكثير من غيرها )
لن أشرح ما عنيته بهذه العبارة لأني كما قلت إن بدأت فلن أنتهي .

مشكور خيي وحبيبي هامور

[هامور]

عدناااااا من جديد ولاحظت من الردود عدة نقاط احب ان اركز عليها

لما شب تقدم لبنت ما وافقت فيو ومعتبرو كنت من افهم شباب النبك
طلع هو وقرايبينو يحكو عليها لانها ما قبلت فيو فعلا شي عيب
هنا بالتحديد تايغر وضعنا امام احدى السلبيات التى نراها ونشاهدها
وهي نقطة مهمة جدا نرى ان الشاب يحاول تبرير رفض البنت له باختلاق الشائعات عليها او ذمها؟؟؟ فقطلأنها لم ترضى به ؟؟؟مشكلة....

ايضا الاخت شروق عبرت بطريقتها عن مغزى الموضوع

لماذا الزعل ؟ كل فتاة لها راغب وكل شاب وله راغبة
عادي ,و إذا كان الشاب واثقا" من نفسه لن يهمه وسيحترم اختيار العروس [/
QUOTE]وهذا هو المقصود تماما
الاخ المثنى مشكور لرايك

وسواد الليل ايضا رات ان نظرتنا اصبحت مادية(ليس الكل ولكن الاغلب)

الاخ قسام ايضا طرح فكرته عن كثرة طلبات اهل البنت التي تصبح تعجيزية احيانا؟؟
[QUOTE] : والنعم منك ومن خلقك ومن أهلك ، بس بدي لبنتي مهر مليون وصيغة 100 ألف عجبك عجبك وإذا ماعجبك الله معك.
2: مابدنا منك شي نحنا المهم نشتري رجال وقبل العرس بشهرين بدنا بيت وغرفة نوم حفر و سيارة وأمك ما تجي لعنا وبدي أمي معي بالسعودية
الله يعين هالشباب بهيك حالة.........

سمارت كت ايضا مشكور

لكل شاب فشل في الارتباط بمن أحب أو فتاة لم ترتبط برجل أحلامها
بقول
عسى أن تكرهوا شيا و هو خير لكم و عسى أن تحبوا شيئا و هو شر لكم
عاد اترك الأمر لربك
دقة قلب مشكورة وضحت وجهة نظرها بأسس الاختيار

طبعاً كمان من حق الشاب اختيار شريكة حياته وأيضاً من حق الفتاة ذلك..
ولكن حبذا لو يكون اختيار كلاً من الطرفين على أسس ومبادئ غير هذه التي نراها..من مال وذهب وترف وتبذير وجمال ووووإلخ

وركزت على نقطة مهمة وهي عدم نشر قصة الرفض وصرع الدنيا .....خلص مافي نصيب وكفى ...........
حبيبي مغترب

"مدري ليش نخزني هالموضوعههههههههههههههههه

بسيطة الله يرزقك بنت الحلال وانت بتستاهل كل خير ومتل ما قلت انت كلو نصيب

هلا بالمهلب مشكور على وضع القصة الاساسية للقبقاب وهي معلومة جديدة بالنسبة لي والشكر لك لوضع اسباب تكبير شغلة القبقاب

والمشكلة بالقبقاب ليس بمبدأ الرفض فهو نصيب

بل من المحيط

1- شباب يجعلونك حديث السهرات ومَدعى للسخرية
2- أناس يزاودون عليك ويقولون من الأساس لم أرد لك هذا البيت
3- بعض من كان يمدحون لك بالفتاة أصبحوا يذمونها بنفس الأمور التي مدحوها بها
نعم اخي هذه عوامل ساعدت على ذلك ولكن يبقى الامر بيد الشاب وكيف يتقبل الفكرة وماهو مدى ادراكه للامر ........مشكور مهلب

هلا بالقسام من جديد وطرحك للحديث الشريف اللذي للاسف لا يطبق ابدا ؟؟؟

لهيك فيه حديث شريف بيقلك أخي مهلب
((أسروا الخطبة وأعلنو النكاح))

يعني مافي داعي كل الحارة و(رفقاتك) يعرفوا أنك رايح تخطب.... مشان ما يصير فيك متل واحد بزمانه.نعم صحيح كلامك مشكور...

هلا بصديقي الشبح (مبين عليك معاني من الخطبة تمام ههههههههههه)بعين الله


اخي الهامور أنا من وجهة نظري بما يخص الشاب وطريقة بحثه عن الفتاة
معترض (ومن زمان ) عل طريقة ( الشوفة والدوران بين البيوت)...
وهذه الطريقة برأيي من الأصل خاطئة ....مع إدراكي لصعوبة اختيار الفتاة
لمن هو مغترب اخي وانا متلك معارض لهذه الطريقة حاولت ان اتجنبها ونجحت في ذلك ولكن ربما حظي ساعدني؟؟؟؟
ولكن للأمانة لا اعرف طريقة بديلة ومقبولة بمجتمعنا؟؟؟؟
ربما هناك طرق كثير قد تناسب البعض ويرفضها البعض كل على حسب بيئته ؟؟

لكن لنحاول ان نبتعد عن السلبيات وليست كل العادات جيدة؟؟
ربما فيها شيئ جيد نطبقه ونترك ماهو ضار قدر الامكان.........

يبقى اهم مافي الموضوع هو حسن الاختيار ........

تحياتي للجميع
(كنت حابب اقلب الموضوع مزح بس الردود الجادة منعتني بجوز نكمل مزح بعدين)من زمان ما ناقرنا؟؟؟

شكراااااااا لكم

[●•°BaSmA°•●]

مشكور أخي الهامور
موضوع القبقاب صعب عالشاب والفتاة
بس أغلب حالات القبقاب سخيفة ويمكن أنو الأهل تتداركها من خلال السؤال
مثلا شب راح يخطب فتاة بيطلع وما بعود يرجع بحجة انو طويلة قصيرة سمينة شكلها ومن هالحكي الفاضي
طيب نحنا عايشين بمجتمع مفتوح على بعضو بإمكان الخاطب يسأل ويشوف قبل ما يورط حالو ويورط العالم معو
وأيضا الحكي بالنسبة لأهل البنت بالإمكان السؤال عن الأشياء الظاهرية إذا رح يكون رفضهن مشان طويل وقصير وغني وفقير
طريقة الخطبة عنا فيها شي غلط
الله يهدينا ويصلح حالنا

[هبة]

السلام عليكم
كلامك اخ هامور كلو صحيح
اذا سمحتولي بهي الغنية كانوا اخواتي بعد كل قبقاب يغنوها لبعضن
قبقابك يا حبيبي ما أوصفو طبيبي
قبقابك كعبو مدور عمل براسي منور
و الها تتمة بس مو كلها حاضرة
طبعا الاغنية على نغمة رمانك
لا تواخذوني و منكم السماح

[laymonaal7elwa]

مرحبانسيتو تقولو شغلة
لما الشب بيلحق بنت بلشارع وبعدماوصلها على بيتها سأل وما رجع لسبب ما
بعض البنات بيقولو هو اجا وانا ما رضيت لانو غليظ...وسيارتو قديمة ومن هلحكي مشان يفرجو العالم انهن مرغوبين وبيرفضو كتير عرسان
وقتهابياكل قبقاب وهو ما معو خبر لوقتها بحس بانو القبقاب الاول اخف علمعدة وبصير يقول مية قبقاب متل الاول ولا واحد زور

[ليل الوحده]

...طيب

كتبتو عن الحمايي اللي ما بتخطب بنتها غير
لواحد معو سياره 8 سلندر...
ويوم الخطبه بتطلب م العريس يرفع الكبوت حتى تعد البواجي...ههههههههههه

تحياتي...........